Mae tîm Perchnogaeth gan Weithwyr (PG) Cwmpas wedi cefnogi busnes arall i ddod yn fusnes sy'n eiddo i'w weithwyr.
efydlwyd 3P Technik yn y flwyddyn 2000 gan ei Rheolwr Gyfarwyddwr presennol, Glyn Hyett; roedd y cwmni wedi'i leoli yng Nghaerdydd yn wreiddiol, cyn symud i Aberteifi yn 2005. Yn 2008, sefydlodd Glyn Celtic Sustainables Ltd ar ôl gweld bwlch yn y farchnad ar gyfer cynhyrchion adeiladu cynaliadwy yn yr ardal.
Mae'r newid i fod yn fusnes sy'n eiddo i'r gweithwyr (EO) yn dod â'r ddau gwmni at ei gilydd o dan un grŵp, Celtic House Holdings Limited, gan weithredu o uned ffatri ar y cyd ym Mharc Teifi yn Aberteifi a chyflogi 17 o bobl. Ers symud i Aberteifi dros 20 mlynedd yn ôl, mae'r busnes wedi cyflogi mwy na 50 o bobl leol – rhywbeth sydd wastad wedi bod yn bwysig i'r sylfaenydd, Glyn, ac yn rheswm allweddol dros ei benderfyniad i drosglwyddo perchnogaeth i'r gweithwyr gan ddefnyddio model Ymddiriedolaeth Perchnogaeth Gweithwyr (EOT), yn hytrach na gwerthu'r busnes i gwmni arall.
Bydd Glyn yn aros gyda'r busnes ar ôl iddo drosglwyddo i fod yn eiddo i'r gweithwyr. Esboniodd Glyn:
"Wrth ystyried dyfodol y busnes, roeddwn i eisiau rhoi rhywbeth ar waith i sicrhau ei fod yn aros yn Aberteifi, ac i sicrhau bod gan y bobl sydd wedi bod yn ffyddlon i'r Grŵp ac i mi ers cymaint o flynyddoedd rywfaint o sicrwydd swydd".
“Fe wnes i ystyried y llwybr traddodiadol o werthu i gwmni arall yn y diwydiant, ond doeddwn i ddim yn barod i adael y busnes eto; roeddwn i hefyd yn ymwybodol, pe bawn i’n gwerthu i drydydd parti, y byddai’n debygol y byddai’r swyddi’n gadael y rhanbarth – ac roedd hynny’n rhywbeth nad oeddwn i’n fodlon ei wneud.”
Ychwanegodd Glyn: "Rwy'n aros gyda'r busnes am y dyfodol rhagweladwy, er mwyn gallu trosglwyddo fy ngwybodaeth am drin dŵr ffo ac adeiladu cynaliadwy i weddill y tîm yma, ac i sicrhau bod gan genedlaethau'r dyfodol gyfleoedd i adeiladu gyrfaoedd boddhaus yn y rhan hon o'r byd sydd mor hardd.
"Er y bydd y busnesau’n parhau i weithredu’n annibynnol o dan eu brandiau eu hunain, mae’r cam hwn yn cynrychioli ymrwymiad ar y cyd i stiwardiaeth hirdymor, cyflogaeth leol a busnes cynaliadwy".
Bydd Glyn yn rhan o fwrdd ymddiriedolwyr EOT Celtic House ar gyfer grŵp cwmnïau Celtic House, ynghyd ag aelodau bwrdd yr ymddiriedolaeth i weithwyr, Jane Heard a Rhys Rideout. Yr aelod annibynnol o fwrdd yr ymddiriedolaeth yw Sarah Owens o dîm PG Cwmpas. Mae'r uwch-reolwyr Andrew Mayer, Morag Embleton ac Anthony Kerr wedi'u penodi'n Gyfarwyddwyr newydd Celtic House Holdings.
Mae gwasanaeth Employee Ownership Wales gan Cwmpas yn rhan o Social Business Wales ac o deulu Business Wales, y ddau ohonynt yn cael eu hariannu gan Lywodraeth Cymru. Maent yn cefnogi busnesau wrth iddynt lywio'r broses o drosglwyddo i fod yn eiddo i'r gweithwyr, gan ddarparu cymorth ymgynghorol pwrpasol i'ch helpu i benderfynu a yw perchnogaeth gan weithwyr yn ateb addas i'r perchnogion a'u busnes.
Dywedodd Sarah Owens, Ymgynghorydd Perchnogaeth gan weithwyr arbenigol ar gyfer Cwmpas:
Mae wedi bod yn wych gweithio gyda Glyn a’r tîm yn Celtic House Holdings ar eu trawsnewidiad i fod yn fusnes sy’n eiddo i’r gweithwyr.
“Roedd cymhellion Glyn dros ddefnyddio’r EOT yn glir, a buont o gymorth mawr i ni lunio’r weledigaeth ar gyfer y broses drawsnewid a sut y byddai’n gweithio i Glyn a’i dîm yn y grŵp unigryw hwn o gwmnïau. Mae’n newyddion gwych na fydd y sgiliau a’r arbenigedd a feithrinwyd dros gynifer o flynyddoedd yn cael eu colli, ac y byddant yn aros yng Ngheredigion diolch i’r symudiad hwn tuag at Berchnogaeth gan y Gweithwyr. Mae hwn yn gyfnod cyffrous iawn i Celtic House Holdings, ac roedd yn anrhydedd ein bod wedi gallu eu helpu i gyrraedd y cam nesaf yn eu datblygiad.”
Cafodd Glyn a'r tîm gefnogaeth gan JCP Solicitors drwy gydol y broses o drosglwyddo i fod yn eiddo i'r gweithwyr.
Dywedodd Natalie Jones, Cyfarwyddwr ac arbenigwr EOT yn nhîm Corfforaethol a Masnachol JCP:
Rydym yn falch iawn o fod wedi gallu cefnogi Glyn a’r tîm wrth fabwysiadu model perchnogaeth gan weithwyr ar gyfer y Grŵp. Bydd yr EOT yn sicrhau bod diwylliant y Grŵp yn cael ei ddiogelu, yn ogystal â phresenoldeb parhaus y Grŵp yng Ngheredigion.
"Mae EOTs wedi cynyddu mewn poblogrwydd yn y blynyddoedd diweddar fel ffordd ymarferol ac effeithlon o ran treth o ymadael â busnes – ac mae’r cytundeb hwn yn dangos pa mor dda y gall y model weithio pan gaiff ei roi ar waith yn ofalus. Dymunwn bob llwyddiant i Glyn a’r tîm yn y bennod newydd hon."
Rhoddodd Nick Toye, Cyfarwyddwr BPU, a Martin Knight, Cyfarwyddwr BPU (o'r cwmni cyfrifwyr BPU), gyngor hefyd ar agwedd ariannol y Trafodiad. Dywedodd:
"Mae wedi bod yn wych bod yn rhan o'r broses o drosglwyddo busnesau Cymreig lleol i fod yn eiddo i'r gweithwyr. Mae'r model EOT yn cyd-fynd ag uchelgeisiau blaengar y ddau gwmni ac yn grymuso'r gweithwyr i yrru'r busnesau yn eu blaenau gyda'u hegni a'u syniadau, gan elwa yn y pen draw ar lwyddiant yn y dyfodol. Gall y diwylliant a'r gwerthoedd craidd sy'n rhan annatod o fodel perchnogaeth EOT barhau, ac yn ddi-os, byddant yn galluogi'r busnesau i ffynnu."
